Sinnüberlistig

Auf Schweizerdeutsch

Gester hani sit langem wieder mal Parfüm benutzt. Und churz nach dem, wo ich im Auto gsesse bin und mis eigene Parfüm gschmöckt han (und das eigentlich au mega gfiret han will ich de Gruch lieb) isch mer en Gedanke cho. Als Manifestor passiert mir das ganz oft, dass ich irgendwo bin oder irgendöpis machä und plötzlich chunnt mer en Impuls, en Gedanke, en Idee, en Drang, öpis z’machä. Und ich han glernt, dene z’folgä und uf sie z’losä.

Und ich han mir denn plötzlich so überleit wie absurd dases isch, dass mir alli mögliche Deos, Parfüms, Shampoos, Wösch- oder Duschmittel mit x underschiedliche Duftrichtige benutzet und dur das de natürlichi Gruchsinn wo mier - gnau wie Tier au händ - überdecket.

Wo ich d'Anti-Baby-Pille nach jahrelanger Inahm abgsetzt und mich gnauer drüber informiert han, was sie eigentlich im Körper macht und bewürkt, han ich dörfe lerne, dass Pille bispils ufgrund vodä künstliche Hormon nebst vielem andere au dä eigeni Gruchssinn veränderet. Dur das schmöcket d’Mänsche denn andersch, als wänn mer nöd underem Ifluss vode Pille stah würd und mer findet Mänsche attraktiv, wo mer susch vilich nöd würd (und umgekehrt vermuetlich au, dass mer selber denn au andersch für die andere schmöckt).

Und euse Gruchssinn isch en Sinn, wo eus eigentlich e Füehrig und Orientierig geh sött. Was schmöckt für eus guet? (Grad bsunders für die mit de Human Design Kognition „Gruch“, isch das soo e wichtigi Frag.) Welli Persone passet zu eus und schmöcket für eus guet? Welli Umgebige?

Und indem mir alli mögliche Mittel i eusem Huushalt händ, wo euse Eigegruch (und ich mein nöd Schweiss, mer schmöckt au abgseh devo) überdecket, han ich mir i däm Moment überleit, dass mir ufgrund vo dem vilicht au gnau nöd die richtige Möglichkeite und Mänsche i euses Läbe iladet, will mir euse Gruchssinn - wo für jedes Tier und au eus SO ENORM wichtig isch - überlistet.