klick dich dur d’bilder durä, zum en übersicht becho über dä inhalt vo genius care.

inere ziit voller verschiedene informatione und au voller verwirrig ums thema eltere-si, söll GENIUS CARE dich idä begleitig vo chind vo 0-3 wieder as wesentliche und essentielle erinnere.

i dene 6 wuche gib ich dir all das mit, won ich dur min weg als sozialpädagogin und als mami han dörfe beobachte und erfahre und dur mis vertüfe, recherchiere, reflektiere und inefühle han chönne lerne.

will nüt liit mir meh am herze, as das chind liebevoll, bewusst und klar begleitet werdet. und nüt isch wichtiger, as die erste drü jahr und s’fundament, wo i dere ziit gleit wird.

mis ziel isch es, dich mit GENIUS CARE i dim gfühl z’bestärke, dir (e neui) chraft, zuversicht, klarheit und sicherheit im mami- oder papi-si geh, dich vilich au chli ufrüttle, unagnehmi sache aspreche, bestehends hinderfrögä, unbewussts bewusster mache und vor allem zum nah-, um- und witerdenke arege.

♡ ♡ ♡

wänn: genius care het vom 11. november bis 22. dezember 2024 stattgfunde. du bisch aber jederziit herzlich willkommä, zum dezuecho und häsch denn direkt zuegang zu allne inhält. (und das bis endi 2025, so dass du gnueg ziit häsch, zum alles losä)

priis: 180.-*

i dä undere audiodatei gang ich no chli gnauer uf die verschiedene wuchä ii und was sie beinhaltet. und es isch au guet, wenn du mini stimm schomal ghörsch, will wenn du dich defür entscheidisch, wirsch du vieli stunde mit mir verbringe und denn isch es vo vorteil, wenn du mir gern zuelosisch. (:

ich bin debi. ♡

*falls dä priis für dich zurziit us finanzielle gründ nöd möglich isch, du aber sehr gern debi wärsch, meld dich bi mir und mir findet e lösig.

witeri informatione:

wie genius care ablauft

dä inhalt vo genius care isch uf 6 wuche ufteilt mitem gedanke, dass mer so i jedere wuche tüfer ines thema itauche chan und au gnueg ziit het zums ufneh & integriere. du chasch dir d'inhält aber au andersch ufteile unds i dim eigene tempo alosä.

wie lang du zugang häsch zudä inhält

dä zuegang zu allne inhält isch bis endi 2025 offe.

was mich dezue befähigt

in erster linie mini lideschaft für das thema, will egal welli us- und witerbildige mer het, mer lernt und verinnerlicht nie glich guet und git sich nöd glich dri, wenns eim nöd persönlich packt. und es git nüt, wo mich meh begeisteret und intressiert as alles rund ums eltere-si und s'begleite vo chind. das het scho früeh agfange, isch mit minere usbildig in sozialer arbet (mitem schwerpunkt sozialpädagogik) und mehrere jahr im kinder- und jugendbereich witergange und het sich dur ganz viel vertüfige, unzähligi büecher, stundelangs nahdenke und verschiedeni witerbildige nur no verstärkt. und sit ich im 2022 selber mami worde bin, han ich mich no meh i die themene drigeh, mich mit ganz vielne eltere und au fachpersone ustuscht & au sehr sehr vieles dörfe beobachte und erkenne.

Für wen GENIUS CARE isch

für all, wo sich wünschet, eltere z'werde, für all, wo eltere sind, für all, wo chind im alter vo 0-3 begleitet und für all, wo ihres wüssä erwitere und zum nah-, um- und witerdenke agregt werde möchtet.

wie viel Ziit du dir für GENIUS CARE neh dörfsch

d'audiodateie vo jedere wuchä sind zwüschet 1-3 stund. du chaschs dir aber natürlich so ufteile wie du möchtisch und die jewilige wuchethemene wie podcastfolgene losä, wo und wänns dir passt.

wieso dases genius care heisst

genius care isch inspiriert vodä frag: wie chönd mir eusi chind vo afang ah i ihrem genius unterstütze und was bruchts, damit sichs genius vo eusne chind entfalte chan? uf de suechi nach antworte uf die frag, han ich so vieles dörfe erkenne, erfahre, lerne und mini eigene perspektive erwitere und all das isch i genius care inegflosse. genius care isch debi aber kei abschlüssendi antwort oder wahrheit. will die gits nöd und wirds vermuetlich au nie geh. vielmeh dienet d'informatione vo genius care als aregig und als wegwiiser, zum vieles wieder klarer chönne gseh, dim eigene gfühl meh folge und dini eigene antworte und wahrheite findä.

falls du no meh wüssä möchtisch oder witeri fragä häsch, schrieb mir gern.

Testimonial GENIUS CARE

es paar stimme zu genius care:

Endlich find ich en ruhige Moment zum mich vo ganzem Herze für dini wundervolli, herzvolli, liideschaftlichi, unfassbar interessanti und sehr wertvolli biiträg zbedanke. Du häsch voll is schwarze troffe mitem um-, nah- und wiiterdenke. So fescht bin ich dir dankbar würklich. All theme sind grossi augäöffner und ich han jedi minute podcast gliebt. Zudem es grosses kompliment a dini agnehmi stimm, dis tempo und a dis gewaltige wüssä und wiä du das so verständlich chasch überebringe mit dine biispiel.

Manuela

Ich bin die Genius Care Wuchene nur so am ufsuuge. Es isch so spannend und du häsch sone gueti Art und Wiis will du dusch nie verurteile sondern erchlärsch alles mit so viel Verständnis und ich chan eifach so viel drus use mitneh für min Weg als Mami. Ich hoffe dass ganz ganz gaaanz viel Lüüt das loset will es isch würklich u mega wertvoll was du verzellsch und ich finds mega intressant. Es macht würklich so Spass zum zuelose, sogar wenn e Ufnahm zwei Stund gaht es macht eifach ZACK und scho sind zwei Stund ume. DANKE CORINNE, ICH LIEBS!

Elina

I LOVE IT! es isch sooo spannend und erchlärt au soooo viel Moment woni erlebt ha und es isch sooo ufklärend! mega😍

Tamara

es isch soooo lässig gsi (und au vertraut) uf de muetersprach öpis zkhöre. 6 wuche tönt nach lang aber jetzt wos ume isch, wünscht ich mir es würd wieter gah :) du hesch so viel zyt und wüsse i genius care investiert und das merkt me au! es isch beste wo ich sit langem online kauft hann.

Andreja

Wow, so toll dä Kurs! Ig finde dini Audios super und sehr beriichernd und Blickwinkelerwiiternd.

Magdalena

Ach Corinne✨ Ich findes sooo sooo spannend! Es isch so schön zum Dir zuelose und bestärkt mich so i mim Denke und glichziitig regts au däzue a, gwüssi Sache anderst azluege oder uszprobiere. 🥰

Lea