Momentani Gedanke

Auf Schweizerdeutsch

die gröschte 'influencer' und inspiratione für mich sind gad die mensche i mim lebe, wo alle grund hettet, zum mit ihrere haltig, ihrem si oder au de art und wiis wie sie lebet, e grossi richwiti ufzboue oder z'ha aber das gar nöd wend, sondern all das viel meh für sich gnüsse wend und demit glichzitig en grosse ifluss uf die mensche hend, wo persönlich mit ihne im kontakt sind. und die qualität, wo das zämme mit dä präsenz und privatsphäri het, isch (zumindest ufgrund vo minere beobachtig) so unendlich gross.

und mir isch absolut bewusst, was social media eus i dere ziit au für kreativi, flexibli und finanzielli möglichkeite git - gad as eltere - aber mengisch frög ich mich au, was es eus glichzitig alles wegnimmt. und ich bimer sicher, dass sich euse umgang demit ide negste jahr so fescht verändere wird und scho jetzt laufend duet. und ich liebs drüber nahzdenke, wie die veränderig usgseh chönnt.

für das frög ich mich zum bispil; was hemer vor social media gmacht? was devo isch wertvoll gsi und würemer eus wieder meh wünsche? was isch belastend im umgang mit social media und was au schön und berichernd? wenns morn kei social media meh gebt, was wer denn andersch? und was chönnt denah cho?

will ich glaub social media het sini rolle & ufgab gha, eus so viel informatione geh, eusi perspektive, euses verständnis und eusi realitäte erwiteret und eus au dezue ermuetigt, eusi eigeni z'finde. und ide negste jahr wirds viel meh drum gha, die au chönne verankeret statt fragmentiert & abglenkt z'lebe.