Human Design Inputs

Auf Schweizerdeutsch

Es paar Human Design Erinnerige & Aregige:

Energie-Type:

  • Manifestor-Chind sind so friedlichi Wese BIS öpis massiv gege ihres innere Gfühl gaht. Und denn chunnt e Chraft und au e Wuet füre, wo für anderi amigs überraschend und teils au schockierend si chan. Und es isch die Site, wo oftmals z’fescht gwichtet und beschriebe wird und drum en Erinnerig für all Eltere mit Manifestor-Chind: Du häsch eis vode friedlichste Chind, bsunders denn, wenn du d’Energie au verstah & begleite chasch.

  • Bi Manifestor-Chind isch die erst Antwort und Reaktion vilich oftmals “Nei” - das isch dä Schutz vodä gschlossnige Aura. Aber nacheme churze Moment chans “Nei” denn doch plötzlich zume “Ja” werde, drum isch es mengisch hilfrich, zum eifach churz abwarte.

  • Um Erlaubnis frögä als Manifestor-Chind oder informiere als Manifestor-Erwachsene isch nöd öpis, won eus Manifestors liecht fallt (mir wend eifach mache und sind eus debi nöd bewusst, was das für e Würkig het) und drum bruchts Üebig. Und mit dä Zit stellt mer denn fest, dass s’Lebe dur das so viel eifacher, entspannter und au friedlicher wird.

  • Was ich ah Manifestors bsunders schätze isch, dass sie Sache nöd eifach machet, will sie so gmacht werdet, sondern sone Stärchi und au dä Muet hend, zum anderi Weg gseh und (vorus)gah - und das vor allem denn, wenn sie uf ihres Gfühl und ihri Impuls loset.

  • Immer wenn du als Manifestor hässig bisch, isch d’Frag: WAS wotsch und chasch du verändere, arege oder astosse, so dass es ebe genau andersch isch oder andersch wird? Will das isch dis Gschenk und au das, wo dich wieder friedlicher und freier fühle laht.

  • Als Manifestor han ich amigs au en “Sacral hangover”. Wenn ich z’viel gmacht oder au z’viel Programm gha han, denn isch das dä Moment, won ichs merk und mich wieder zruggziehn und erhol.

  • E wichtigi Erinnerig für Projectors: Wenn s’Problem für öper nani gnueg gross isch, machs nöd zu dim Problem. Au wenn dus gsehsch oders für dich offesichtlich isch; will wenns füre Person selber no keis Problem isch, isch sie meistens au nöd glich offe für din Ratschlag und din tüfe Fokus, wo du häsch.

  • Generators und Manifesting Generators erkennet oftmals ersch was sie wend oder nöd wend, wenns vor ihne isch und sie druff reagiere chönd. Drum isch Strategie au warte und ufs Lebe antworte. Und je meh du als Generator oder Manifesting Generator i dinere Freud bisch, desto meh Möglichkeite werdet sich vor dir uftue und ergeh. Und s’isch so wertvoll, wenn denn au die verfolge chasch, wo dich begeisteret. D’Erin Claire Jones het das i ihrem Buech so schön beschriebe: “While waiting for a response is an integral part of your strategy, your gift actually lies in action; waiting simply ensures that action is directed towards making the right things happen.” Und drum isch dini Strategie warte BIS dis Buchgfühl aspringt und dir zeigt, wos duregaht und denn liits ah dir, dem vertraue und au würklich losgah.

  • UND als Generator oder Manifesting Generator häsch du sone anderi Energie, wenn du voller Freud statt frustriert bisch. Will du generiersch Energie, WENN du das machsch, wo dir Freud macht. Wenn du hingege z’viel Sache machsch, wo dich eigentlich aschisset, wo du denksch, dass sie mache muesch und dich dezue zwingsch, kei Grenze setzisch und denn eschöpft und frustriert bisch, generiersch du kei Energie sondern sugsch sie mit dinere Frustration praktisch usem Ruum us.

  • Was mich ah Manifesting Generators übrigens immer wieder fasziniert, isch die Kapazität, wo sie händ. Die Kapazität, zum so viel Sache träge, hebe, mache und umsetze. Amigs bechumi nur scho vom Zuelosä es Burnout.

  • Für alli Reflectors: Eui Strategie und eigentlich au Autorität isch es, en Mondzyklus lang abwarte. Und es isch i dem Sinn keis passivs warte, sondern ihr sind als Reflector ständig in Bewegig (wie dä Mond au). Und dur das nehmet ihr immer wieder Abstand vo verschiedene Idrück, Moment und Sache und mit jedem Abstand und jedere Bewegig, won ihr machet, vergrösseret sich s’Verständnis wieder und klickt wieder öpis. Das chan scho nach es paar Täg dä Fall si oder mengisch au ersch nach eme volle Mondzyklus (ca. 28 Täg). Und drum isch es für eu so wichtig zum warte bzw. euch bewege.

Autorität:

  • Wenn du en emotionali Autorität häsch, isch es für dich so wichtig, dir bi Entscheidige Ziit z’lah. Will ersch mit dä Ziit wird dir klar, was für dich richtig isch und was nöd. Es gaht also weniger um das Gfühl, wo du grad imoment hesch, wenn ah die Entscheidig denksch, sondern das bliebende Thema, wo mit dä Ziit hange bliebt und entstaht. Es fühlt sich mengisch so ah, als wür mer ine gwüssi Richtig zoge, womer nöd mental erkläre chan aber sich efach guet afühlt. Und dä richtig Ziitpunkt zum entscheide isch denn, wenn kein Druck und keis nervöses Gfühl meh da isch, zum JETZT SOFORT mösse en Entscheidig treffe, sondern en inneri ruhigeri Klarheit. Drum: Lahn dir so viel Ziit, wie du bruchsch, bevor du en Entscheidig triffsch. (und öpis, wo nöd korrekt isch, verlürt mit dä Ziit übrigens au meistens ah Bedütig und gheit wieder weg.)

  • Mitere emotionale Autorität wirsch du dir zudem vermuetlich nie 100% sicher si. Es schwingt immer e liechti Unsicherheit mit, will dini Emotione sich ständig wieder veränderet und drum langet au 96% Klarheit. Und was au wichtig isch mitere emotionale Autorität isch, dass du dini Emotione nöd immer rational begründä oder erchläre muesch. Dini Stimmig gaht ufe und abe und wechslet ab und wenn du ufeme Höch bisch, het das oft wenig z’tue mit dem, dass din Tag gad super lauft oder öper mega nett gsi isch zu dir, sondern dass du das eifach dur dini emotional Welle und dem Höch, wo drin bisch, gad andersch wahrnimmsch. Und s’gliche isch, wenn eher melancholisch underwegs bisch; denn isch nöd dä Fritz oder Franz d’Schuld dra, sondern oftmals isch es eifach wieder die ander emotional Brülle, wo du grad ahäsch. Und so lang du nöd immer en Grund drahenksch, isch s’Lebe viel eifacher.

Profil:

  • Als 1/3-Profil entstönd die beste Fründschafte und Verbindige oftmals zuefällig. Wemer sich is Lebe inegit und vertüft und denn plötzlich Lüüt begegnet, wos eifach passt.

  • Für Mensche miteme 1/3-Profil isch Ehrlichkeit so wichtig. Lüge isch schlimmst und du wirsch vermuetlich nie meh glich vertraue, wenn en Mensch dich mal agloge oder falschi Versprechige gmacht het. Will du testisch ständig, ob s’Fundament stabil isch und i dem Prozess findsch au immer d’Wahrheit use.

  • Wenn du es Chind häsch miteme 1-Profil, chans bsunders wertvoll si, wenn er oder sie abeme gwüsse Alter uf öpis hischaffe chan (und debi Geld verdiene). Will für sich selber chönne sorge, isch es wichtigs Fundament und drum für 1-Profil nomal bedütender.

  • Für Mensche miteme 2-Profil im Human Design isch Selektivität so wichtig; chönne bewusst uswähle und entscheide, mit wem mer Ziit verbringe und sini natürliche Talent teile möcht. Und sich die restlich Ziit au wieder chönne zruggzieh, erhole und mit dem beschäftige, wo mer grad möcht.

  • S’4-Profil im Human Design chasch der vorstelle wie de zweiti Stock vome Huus. Und dä underi Stock isch s’Umfeld und es sind die Mänsche, wo am 4-Profil Halt gebet. Und drum isch es für Mensche miteme 4-Profil au oftmals wichtig, zum zerscht es neus Fundament ha, bevor sie witergah chönd; zersch en neue Job finde, bevor mer de alti hinter sich laht, zersch öper Neus kennelerne, bevor mer witerzieht usw.

  • Mensche miteme 4-Profil hend übrigens oftmals die beschte Spitznäme für Fründinne & Fründä.

  • Als 5-Profil isch es so wichtig, zum klar kommuniziere. Was bisch du GENAU bereit zum mache und was nöd? Wo willsch du unterstütze und wo isch dini Grenze? Will du bringsch automatisch e Projektionsflächi mit und die machts anderne schwerer, zum dehinder gseh. Du chaschs der vorstelle, als wäret anderi blind. Sie gsehnd dich nöd richtig und genau drum isch Kommunikation so relevant. Will je klarer und detaillierter du beschriebsch und seisch, was du willsch und was nöd, desto klarer wirds Bild für anderi und desto besser chönd sie dich hinder dere Projektionsflächli wahrneh.

  • Mensche miteme 6-Profil händ vor allem idä zweite und dritte Phase vo ihrem Lebe sone integrierti und verankerti Energie. Und sie mönd nöd emal viel erkläre oder sich ewig lang mit öpisem beschäftige, sondern sie lebets eifach vor, gsehnd viel Sache objektiver und ermöglichet eus dur das wieder en anderi Perspektive.

Energiezentre:

  • Chind, wo es offnigs Emotionszentrum händ, sind eigentlich ständig de emotionale Welle vo anderne usgsetzt - ganz bsunders vodä Eltere, wenns bi ihne definiert isch. Und wenn s’Mami oder dä Papi immer mal wieder en emotionale Usbruch het, isch das für die Chind au bsunders astrengend und füehrt dezue, dass sie nöd in Schwierigkeite grate wänd und denn gwüssi Sache vermiedet, unterdrücket oder nöd ehrlich sind. Sie denket denn vilich - bewusst oder unbewusst - “ich seg das besser nöd mine Eltere, will susch reagierets wieder so emotional und denn machts au mit mir wieder uh viel und das verträgi eifach nöd und drum willi das lieber nöd”. Und das chan dezue füehre, dass die Chind scho früeh Heimlichkeite und Gheimnis gegenüber de Eltere entwicklet bzw. händ.

  • Wenn du als Mami oder Papi es undefinierts Emotionszentrum häsch, denn nimmsch du d’Emotione vo dinere Umgebig verstärkt wahr und uf. Aber irgendwenn isch gnueg mit ufneh und denn musch au wieder us dere Energie use, zum dich nöd komplett devo mitrisse oder durespüele lah. Und das isch so wichtig für dich zum wüssä gad idä Begleitig vo Chind und ganz bsunders denn, wenn dis Chind das Zentrum definiert het.

  • Wenn dis Chind es undefinierts Herz-Ego-Zentrum het, ischs nöd da, zum öpis mösse bewiese (bsunders nöd dir als Mami oder Papi). Aber es chan ständig dä Druck gspürä und drum chans wertvoll si, wenn du sie oder ihn immer wieder dra erinnerisch und vor allem de Druck nöd selber ufbausch (ganz viel witeri Infos zum Human Design vo Chind findsch übrigens au im Human Design Kind Buch.)

  • Eltere miteme definierte Milzzentrum hend oftmals e grösseri inneri Sicherheit und machet sich weniger schnell Sorge um Gsundheit vom Chind weder Eltere miteme undefinierte Milzzentrum. Und au bi Chind chan sich en Unterschied zeige: Chind miteme definierte Milzzentrum hend tendenziell e konstanters Sicherheitsgfühl weder Chind miteme undefinierte Milzzentrum, wo teilwiis meh Ziit bruchet, zum sich ablöse oder i neue und ungwohnte Situatione wohl fühle.

  • S’oberste und underste Zentrum im Human Design sind Druckzentre. Wenn es Chind beid devo undefiniert het, hets wie kein Dämpfer geg de Druck vo usse. Und drum chans bsunders hilfrich si, wenn dä Druck immer wieder abbaut wird und gad am Abig e Möglichkeit da isch, zum sich wieder chönne entspanne und vo dem Druck löse (und mini Beobachtig isch, dass e Massage vodä Füess & em Chopf vorem Ischlafe so fescht helfe chönd).

Kognition:

  • Wenn dis Chind als stärchste Sinn Berührig het, denn nimmt sie oder er so viel über d’Huut wahr. Vilich reagiert dis Chind sensibler uf Berüehrige, möcht nöch bi dir si oder wird teilwiis au gar nöd gern aglangt. Und vilich reagiert dis Chind au schneller mit dä Huut (Usschläg, Rötige, trochni Stelle usw.)

  • Mensche mit “Feeling” (Gfühl) als Kognition hend amigs wie en sechste Sinn für Sache und ligget demit au oft richtig.

  • Für all, wo Kognition “Smell” hend: Vertrauet euem starche Spürsinn, will ihr schmöcket so oft, was d’Wahrheit isch.

Umgebig:

  • Chind mitere Tal-Umgebig im Human Design fühlet sich oft dett am wohlste, wo sie anderi kennet, wo Mänsche chömmet und gönd und sie mit anderne rede und spiele chönd. Und es sind drum au vielfach Chind, wo am liebste nur idä eigene Siedlig spiele wend, will das ihres “Tal” isch - dä Ort, wo sie agschlosse und akustisch verbundä sind.

  • Und Chind mitere Tal-Umgebig händ au sone Sensibilität für Verbindig. Wenn sie sich i ihrem momentane Umfeld agschlosse und verbunde fühlet, sind sie gad viel usglichener (oder ebe unusglichener, wenn das nöd dä Fall isch).

  • Für Berg-Umgebigsmensche isch es so wichtig, immer mal wieder chönne höcher ufecho und alles vo obe us gseh. Sie bruchet die Distanz, dä Abstand zu Sache und s’abeluege uf öpis und es isch oftmals denn, wo ihne vieles wieder klarer wird und wie Sache neu wahrneh, verarbeite und gseh chönd.

  • Mensche mit Ufer-Umgebig werdet vermuetlich liechter chönne umgah mit dene Wechsel wo ab 2027 uf eus zuecho werdet, will sie Welte mitenand verbinde und sich im Kontrast besser z’recht finde chönd.

Verdauig:

  • Viel Chind aber au Erwachseni mit direktem oder indirektem Licht als Verdauigstyp hend e Lideschaft fürs Fotografiere und au es Aug fürs richtige Licht und Bild.

  • Wenn du als Mami oder Papi “Alternating Appetite” oder “Consecutive Appetite” als Verdauigstyp häsch, denn chans si, dass z’viel ufs Mal für dich stressig isch - seget das z’viel Aforderige im Alltag oder wenn grad all glichzitig öpis vo dir wend.

  • Oder wenn du “High oder Low Sound” als Verdauigstyp häsch, issisch du sozege Grüsch i dinere Umgebig mit. Und gad wenns ständig luut isch oder es Chind schreit, chan das für dich als Mami oder Papi bsunders astrengend si.

  • Oder wenn du “Nervous oder Calm Touch” as Verdauigstyp häsch, denn chans si, dass du entweder besser demit umgah chasch, wenn viel Aktivität und Bewegig um dich ume isch (Nervous) oder dich das schneller stresst und du wieder Rueh und Entspannig suechsch (Calm). > Wenn dich das no meh interessiert, han ich s’Human Design Wüssä übrigens spezifisch ufs Eltere-Si ufgnoh. Du findsch da meh Infos dezue.

Schlaf:

  • Gmäss Human Design isch es für all wichtig, zum regelmässig allei schlafe. Und ich chum immer wieder d’Frag über, wie das denn bi Chind isch und teil ah dere Stell efach gad direkt es Zitat vom Ra selber (und zum klarstelle, das isch nöd mini persönlich Meinig): “I was talking earlier about when should an infant be, you know, put into an environment where it’s on it0s own, have its own room. And my general comment was that as soon as breastfeeding is over, you know, this is a time to begin that process. But there are going to be always exceptions in how that timing works. For example if an infant has an open splenic system, it’s a child that’s insecure. So, you know, if you try to put this child into its own room right away, it’s going to be very frightened. It’s going to feel very uncomfortable. And obviously, it’s going to be very unhealthy and it’s going to be very clingy as a result of that. “ (und genau drum gahts au bi dem immer drum zum uf dis eigene Gfühl lose: Was passt für dich, dis Chind und für eu als Familie?)

  • Und vilich ah dere Stell au no, wieso mer seit, dass es wichtig isch, zum allei schlafe; im Human Design hend mir all es Schlafdesign, wo nur us 15 Tor bestaht. Und im Schlaf findet wie e spezifischi Programmierig für eim selber statt. Und wemer ständig neb öper anderem schlaft, beiflusst mer sich dett gegesitig und nimmt eigentlich am anderi sini Programmierig au konstant uf, ganz bsunders will die meiste Mensche im Schlaf “Reflectors” sind und denn chans au si, dass mer neb öpertem plötzlich andersch träumt. (falls dich das no meh interessiert, findsch im Human Design Playground bi Schlaf no meh Informatione dezue)

Pfiil:

  • Wenn die obere beide Pfiil bim Human Design Chart vo dim Chind nach links zeiget, funktioniert dä Verstand strategisch und strukturiert. Das heisst, dis Chind lernt besser, wenn mer öpis Schritt für Schritt erchlärt (zum Bispil mir dönd zerscht an Fussgängerstreife anestah, links luege, rechts luege usw.). Und wenn d’Pfiil bi dim Chind nach rechts zeiget, denn funktioniert dä Verstand viel offener. Du musch dim Chind nöd erchläre, wie mer über d’Strass gaht, sondern es beobachtet und nimmts automatisch uf, wenns gseht, wie dus (vor)machsch.

  • S’gliche gilt au für dich als Erwachsene. Wenn dä oberi linki Pfiil nach links zeigt, häsch du en aktive Chopf und speicherisch das ab, wo für dich wichtig isch. Und wenn du öpis ufneh oder lerne möchtisch, denn bruchts au es bewussts fokussiere, damits abgspeicheret wird. Du setzisch din Chopf denn wie aktiv under Druck, damit du dich spöter ah das erinnere chasch und es chan au si, dass du Sache mehrmals repetiere musch, zum sie langfristig chönne abspeichere.

  • Und wenn dä oberi linki Pfiil nach rechts zeigt, denn häsch du en passive Chopf. Das heisst du funktioniersch komplett gegeteilig und bruchsch dä Druck nöd, zum dich uf öpis fokussiere oder öpis repetiere unds so bi dir abspeichere, will du automatisch und au die ganz Ziit wie en Schwamm alles um dich ume ufsugsch. Und drum isch es für dich viel eifacher, zum Sache ufneh, wenn du entspannt bisch, dich nöd zu fescht fokussiere oder demit beschäftige musch, dich ah öpis mösse z’erinnere, sondern eifach präsent si chasch.

    (so Erinnerige und Inputs teil ich übrigens immer mal wieder über mini Instagram-Stories aber will ich möcht, dass mir all weniger Ziit i dere App verbringet, überlegg ich mir grad anderi Weg und teil drum au grad wieder meh da über dä Blog)

Corinne Hefti