Witeri Gedanke zum Wechsel ab 2027
mini stärchst energie im human design isch s’tor 24. en energie, wo immer und immer wieder über sache nachedenkt und i dem prozess neui erkenntnis und isichte bechunnt. und drum isch dä wechsel vode energie abem jahr 2027 au öpis, wo mich immer mal wieder beschäftigt und ich teil da es paar vo mine notize und gedanke dezue:
s’offe-si und offe-bliebe wird idä kommende jahr so wichtig si. mir werdet vieles wieder neu dörfe gseh und au verlerne. und wenn mir eus z’fescht verstiefet i eusem denke, eusne meinige und wie sache doch si söttet, werdemer eus und au anderne s’lebe viel schwerer mache. will es isch d’flexibilität, won eus ermögliche wird, eus ah das neue klima und die neu energie, wo chunnt, azpasse und euse flow dett drin z’finde. > heisst, wie chömer wieder meh wie chind si? offe, unvorignoh, spielerisch, neugierig und au im vertraue.
mir werdet ufe neui art viel tüfer mit mensche zemecho (tor 59). es wird echter, ehrlicher, authentischer, vertrauter und verbindlicher. und das werdet verbindige si, wo vo herze chömmet und nöd will mers eifach so macht oder vertraglich ah öpis bundä isch, won eus eich gar nöd guet tuet oder mir gar nöd wend. und vilich werdet au krise uf eus zuecho, wo eus automatisch wieder nöcher zunenand bringet.
vermuetlich werdemer au e tüferi verbindig ufbaue zu dä natur. mir werdet realisiere, dass mir nöd trennt sind vode restliche welt, sondern das alles uf alles en uswürkig und en ifluss het. ich denk das au immer, wenn ich vodä “raves” ghöre, die neu spezies, wo anschinend ab 2027 meh und meh cho wird, will die werdet es kollektivs bewusstsi ha. und d’penta-energie, wo entstaht, wenn e gruppe zemechunnt, werdets sie bewusst gspürä und au nur i dere würklich funktioniere chönne und das zeigt i welli richtig, dass es fürd welt und zuekunft gaht: es wird verbundener und vernetzter.
d’gmeinschaft als grosses ganzes wird vilich nüm die glich bedütig ha wie jetzt (durs uflöse vom kanal 37-40), sondern meh die einzelne beziehige, wo scho da sind oder ersch no entstönd und tüfer werdet. de ra het immer gseit, dass ab 2027 alles viel individualistischer wird und gad ide erste paar jahr vilich au egoistischer. aber egoistisch isch nöd immer negativ - egoistisch chan au si, dass mir ebe meh uf eus loset, eus mit eus selber verbindet und dur das denn au e klareri energie händ, wo es tüfers und echters zemme-si ermöglichet.
mir werdet nüme so strukturiert funktioniere. es wird en usglich geh, en anderi sanftheit, meh liechtigkeit und dur das au meh kreativität.
verantwortig überneh für eus, eusi emotione, euses lebe, handle und si wird es grosses und wichtigs thema si (tor 55). dass mir erchennet, dass mir nöd opfer vo eusne umständ sind, will nur denn chömmer würklich frei si; wenn eus bewusst isch, was füre verantwortig und chraft mir i allem träget und die au entsprechend nutzet.
viel materiells wird nüme die glich bedütig ha. au definition vo erfolg wird sich verändere. dä richard rudd het immer gseit „if you are designing a business, don’t design your business to succeed, design it to meet your needs“ und ich glaub „business“ wird generell andersch werde - es gaht nüm drum „busy“ also beschäftigt z’si, sondern viel meh drum, inezlosä und z’gspürä, was mir würklich wend, was eus guet duet und wie mir debi eusi bedürfnis nöd vergesse und glichzitig eusi individuelle fähigkeite ibringe chönd. und dur das werdemer au freier si und meh kapazität ha für neus und anders (wo so dringend brucht wird).
viel vo eusne strukture und system und eusi welt generell isch so komplex worde. und es wird idä negste jahr meh ums vereifache und erchenne vom wesentliche gah und das uf underschiedliche ebene. was het würklich qualität? und die nostalgie, wo mir amigs gspüret für wie sache gsi sind, zeigt eus, was fehlt und was ebe au qualität het, echt isch und wieder meh integriert und glebt werde dörf.
die neu energie, wo ab 2027 chunnt, wird eus atriebe und dezue füehre, dass mir ständig beschäftigt sind (dur dä kanal 34-20). und i dem ine wird s’verlangsame enorm wichtig si. eus nöd vo allem mitrisse oder verunsichere lah, sondern eus ziit neh, präsent si und uf eus und euses gfühl (strategie & autorität) losä, zum erchenne, was für eus würklich stimmig und richtig isch und was nöd und dur das au euse eigeni weg und eusi intention hinder sache klarer gseh und gspürä. und wenn immer mir efach beschäftigt sind zum beschäftigt si oder eusi chraft abgebet ane üsseri autorität, anen expertin oder en expert, wo schiinbar meh weiss, anen druck, wie mer öpis mache söll und all das nöd dur eusi strategie und autorität filteret, werdemer eus no unsicherer fühle oder eus au verbrenne (s’neue lebensthema vode erde, wo ab februar 2027 chunnt, heisst s’lebensthema vom schlafende phönix, will mir eus i dem neue prozess ine vermuetlich au viel ah eusne erfahrige verbrenne werdet aber dur das au alts wegfalle und us dä äsche denn neus entstah chan).
dä ra het die kommende jahr immer chli düster dargstellt und vo krisene gredet mit ressource-knappheite, klima-veränderige usw. aber ich glaub es werdet nöd emal (nur) so krise si, sondern viel meh identitäts- und sinnkrisene, will nöd nume system, sondern au eusi glaubenssätz dehinder zemegheiet. so vieles wird wegfalle, wo eus bis anhin sicherheit geh het und es chan si, dass viel vo eus sich plötzlich verlore fühlet. was isch überhaupt dä sinn, d’bedütig, wer bin ich, wer will ich si und was wott ich überhaupt mache da? und i dem ine dörfet ebe gnau neui gschichte entstah, neui visione und au neui realitäte.
und wien ich au scho idä einte podcastfolg zum jahr 2027 gseit han; s’losä uf euses gfühl (eusi autorität) isch i all dem so zentral. du chasch der die negste jahr chli wiene achterbahnfahrt vorstelle und wenn du uf dini strategie & autorität losisch, häsch es guets ticket für die fahrt und bisch parat.
„The future belongs to the individual, the humans who operate correctly to what they are and undisturbed from what the world considers “normal”. To be “normal” is the past. There is no longer such a thing. Now, you can only be yourself if you want to belong to a time that is already coming.“