Am Träume

Auf Schweizerdeutsch

Am Träume vonere Welt, wo mir all euses Genius lebet.
Eus bewusst sind, dass mir selber dä Genie sind und i eus händ.
Wo mir euses Läbe kreieret und eusi Träum verfolget,
und glichzitig wüsset, dass mir Teil vo öpis viel Grösserem sind,
nöd alles kontrolliere oder plane chönd,
sondern wieder viel meh vertraue dörfet,
und eus leite lah.

Am Träume vonere Welt, wo mir viel meh eifach si chönd, s’Läbe gnüssä, Neus entdecke, usprobiere, kreiere, präsent si - ohni Druck, ohni Stress.
Wo in Tag ineglebt und jede Moment gschätzt wird.
Wo alles im Überfluss vorhande isch und glichzitig bewusst mit Ressource umgange wird.

Am Träume vonere Welt, wo sone schöni, friedlichi und positivi Energie het.
Wo all grad das am mache sind, wo ihne für dä Moment Freud macht, ihri Lideschafte verfolget und mitenand teilet.
Wo mir dä Sinn nüm länger im Geld verdiene gsehnd, sondern idä Arbet selber suechet und erchennet das mir dur das eus und anderi am meiste unterstützet.

Am Träume vonere Welt, wo mir offe und ehrlich mit eus selber und anderne sind.
Wo Selbstliebi glebt wird und mir d'Verantwortig für euses Handle übernehmet.
Wo mir verstönd, dass alles mitenand verbunde isch und dass wo mir machet immer en Uswürkig uf alli und alles het.
Wo mir i eusere Chraft sind, selber mitdenket und uf euses Gfühl loset.
Wo mir eusi Intelligenz bewusst nutzet und d'Technologie für eus, euse Planet und d'Harmonie vo allem isetzet und debi glichzitig wüsset, dass die faszinierendsti Technologie euse Körper selber isch.

Am Träume vonere Welt, wo Chind lernet, was Liebi, Vertraue und Akzeptanz heisst und das täglich gspüre dörfet.
Wo d’Natur und alli Lebewese uf däm Planet respektiert wärdet.
Wo mir eus selber respektieret.

Am Träume vonere Welt, wo Herkunft, Status oder Geld kei Rolle spielt, sondern all ihre wahri Wert kennet und sich gegesitig immer wieder ah dä erinneret.
Wo unterschiedlichi Haltige und Meinige akzeptiert und respektiert werdet.
Wo mir eusi Unterschied fiiret, statt z'denke dass mir all glich funktioniere, si oder dänke mönd.
Wo mir Verständnis händ fürenand will eus bewusst isch, dass au unterschiedlichi Weg am Schluss zämmefüehret.

Am Träume vonere Welt, won ich am Morge id Bäckerei chan gah und früsches Brot hole, wo mit Liebi bache worde isch.
Oder uf dä Märt, wo s'beschte Gmües und die feinste Frücht sind, vo Mänsche wo d'Erde und d'Natur mit Respekt behandlet.
Wo d'Chind spiele, d'Umgebig entdecke und sich selber si chönd, während mir eus gegesitig im Eltere-si unterstützet, so dass au mir immer wieder Ziit für eus und eusi Kreativität händ,
und debi selber nöd vergesset mitzspiele.

Am Träume vonere Welt, wo Freiheit verstande und glebt wird.
Wo mir die alltägliche Moment bewusst gnüsset und dur das die ganz Magie wiederentdecket.
Wo mir nöd regelmässig s'Bedürfnis nachme Retreat händ, sondern euses Lebe es Retreat isch.
Wo mir realisieret, dass euses Läbe Freiziit isch, will eusi Ziit uf däre Welt frei isch.

Am Träume vonere Welt, wo mir eusi Energie verstönd und mit ihre läbet.
Wo mir d'Verbindig zu allem erchennet, meh vertrauet und mit de Natur zämmeschaffet.
Wo mir eus gegesitig unterstützet, fürenand lueget und mitenand würket.
Wo mir eus d'Schönheit ufzeiget, d’Wunder gsehnd und die mitenand teilet.

Am Träume vo däre Welt.
und all das Träume isch wunderschön,
doch es langet allei nöd.
und drum gahn ich Schritt für Schritt i die Richtig,
und freu mich uf dä Moment, wos kein Traum meh sondern Realität isch.

> holding the vision and creating the capacity to live it.